‘E bellezz ‘e Vico di Angelo Mercurio

Si nun ci è stato mai a Vico Equense,

nun può mai parlà ‘e ‘stu paese bello;
è nu piezz ‘e Paraviso caduto ‘n terra,
e si ‘nci vieni, nun te ne vai ‘cchiù!

E’ circundat ‘a tridici burgate
ca ‘ncuronano ‘stu paese l’una a ‘ll’ate,
sun chin ‘e ulivi, aranci e sciurii fini
ttutt’ e campagne de’ casal ‘e Vico!

‘Sti bellezz so’ sparse ‘ccà e ‘llà
e né ‘a penna né ‘o penniello ‘e sann fa;
Vico Equense è ‘a regina ‘e sta penisola
e tene pè sentinella ‘o Monte Faito!

Se vede proprio ca ‘o Signore se sfaziaie 
a crià ‘stu paese ‘ncopp ‘a chistu mare,
rint ‘a ‘stu golfo ‘e Napule e ‘o Vesuvio,
addò ‘e Sirene cantano l’ammore!

‘A qualunqu ‘o punto tu ammmiri ‘o panurama,
subbeto te vasano ‘ll’onne ‘e chistu mare,
e ‘a sera se sprigiona de’ lampare
armuniosa e allera ‘a voce do’ marinare.

Si siente ‘sta melodia ‘ncopp’ a ‘ll’onne,
te pare nu Paraviso ‘sta terra d’ammore,
te sient ‘o core ca suspira e nun s’accorge
ca sonna ‘o suonno ‘cchiù bello dell’ammore!...

Pe’ chistu mare, ‘stu sole e st’aria profumata,
turisti ‘e tutt ‘o munno veneno ‘ccà,
s’annamorano de’ spiaggie ‘e de’ bellezze toie,
‘e ‘sti tesori ca tu tien rint ‘o core!...

Perciò ‘sti stranieri, appena è primmavera,
veneno ‘ccà e te ne vulesseno purtà,
ma è nu suonno, Vico Equense mai,
tu si’ ‘a mia e nisciun te po piglià!...