lunedì 30 gennaio 2017

Vico Equense - 'A Festa 'e San Ciro di Antonio Cavallaro

A Vico e tutt''e tridece Casale,
se stanno appriparà p'avvenimente:
a fin''e mese è festa patronale:
San Ciro nuosto jesce 'nmiez''a ggente.
Quann''a fine 'e Gennaio s'avvicina,
tòrnano a' casa pure ll'emigrante:
da 'a Francia, da 'o Brasile, 'a ll'Argentina...
Vonn'essere presente tutte quante.
Cuperte 'e pizzo appese a ogne fenesta,
sciure, bandiere....e che bell'allummata!
S'hanno dato da fà, 'e maste 'e festa.
Vedisseve po', 'a chiesa appriparata!
E' overo, pure a Puortece sta 'o Santo
ca è venerato comm'a chillo 'e Vico;
ma 'a storia dice (e pe' nuie è nu vanto),
ca 'o culto nuosto è assaie, assaie chiù antico.
'E piscature, comm'a tutte ll'anne,
vestute janche e blu, pe' devuzione
hann'a purtà a San Ciro e San Giuvanne,
pe' Vico, a spalla. E' na tradizione.
San Cì! Famme sta bbona 'a criatura!
'A miez''a ggente, 'a supplica 'e na mamma,
ll'aìza ncielo cu 'a panzella annura.
Pur'essa cu nu filo 'e voce 'o chiamma.
Na femmena cu 'o chianto rutto mpietto,
'o parla a tu e tu. Comm'a nu frato:
Màritemo, tu 'o ssaie, sta int''a nu lietto;
fancélla 'a grazia, s'è raccumannato!
'E sape bbuono chille chiù 'nfelice;
pare ca 'e guarda 'nfaccia a uno a uno.
Nun te preoccupà, pare che dice,
io n'aggio abbandunato maie a nisciuno.
'A ccà e 'a llà d''e strade, a centenare,
'o popolo ll'accoglie a bbraccia stese,
e sott''e tracche e bbotte d''e murtare,
se va a ffà tutt''o giro d''o paese.
Nun se sparagna, ch'è, nu vecariello,
ca è stritto e s'avarria fermà ogne tanto.
'Na mamma piglia mbraccio 'o guagliunciello:
guarda a San Ciro, dice, e crisce santo!
Antonio Cavallaro

Nessun commento: